50 కోట్లివ్వండి లేదా ఆ సీఎంను చంపేస్తాం

కోల్‌కతా: రూ.50కోట్లు ఇవ్వండి లేదంటే పశ్చిమ్‌బంగా ముఖ్యమంత్రి మమతా బెనర్జీని చంపేస్తాం, హౌరా రైల్వే స్టేషన్‌ను బాంబులతో పేల్చేస్తాం.. అంటూ జైషె మహ్మద్‌ ఉగ్రవాద సంస్థ సభ్యుడినని చెప్పుకొంటూ ఓ వ్యక్తి తూర్పు రైల్వే అధికారులకు బెదిరింపు లేఖ రాశాడు. డబ్బు ఏర్పాటు చేయకపోతే హౌరా రైల్వే స్టేషన్‌ని పేల్చేసి లక్షలాది ప్రజల ప్రాణాలు తీస్తామని బెదిరించారు. ఆ లేఖలో దూరదర్శన్‌ మాజీ ఉద్యోగి ఎస్‌సి దాస్‌ పేరు సంతకం స్థానంలో ఉండటం గమనార్హం. జేఈఎం ఉగ్రవాదులు తలదాచుకునేందుకు తన(దాస్‌) ఇంట్లో ఆశ్రయం కల్పించినట్లు అందులో రాసి ఉంది. ఆ లేఖను రైల్వే సిబ్బంది పోలీసులకు అందజేశారు. బెదిరింపు లేఖలో ఫోన్‌ నెంబరు, అడ్రస్‌ రాసి ఉండటంతో పోలీసులు తనిఖీలు నిర్వహించారు. కానీ ఆ ఫోన్‌ నంబరు, చిరునామా తప్పుడువని తేలినట్లు తూర్పు రైల్వే సీపీఆర్‌వో ఆర్యన్‌ మహాపాత్ర వెల్లడించారు. ముందు జాగ్రత్త చర్యగా హౌరా రైల్వే స్టేషన్‌ పరిసర ప్రాంతాల వద్ద పోలీసులు కట్టుదిట్టమైన భద్రతా ఏర్పాట్లు చేశారు.