బాహుబలి తర్వాత ప్రపంచ వ్యాప్తంగా క్రేజ్ సంపాదించుకున్న హీరో ప్రభాస్. ఈ హీరో క్రేజ్ ఆధారంగా పలువురు నిర్మాతలు భారీ సినిమాలు నిర్మించాలని ప్లాన్ చేస్తున్నారు. బాహుబలితో సంబంధం లేకుండానే వర్షం, డార్లింగ్, మిర్చి, మిస్టర్ ఫర్‌పెక్ట్ వంటి సినిమాలతో అమ్మాయిల కలల హీరోగా మారిపోయాడు. బాహుబలి తర్వాత ఆ క్రేజ్ ఆరాధ్యంగా మారింది. ఈ నేపథ్యంలో ప్రభాస్ పెళ్లి అనే మాట రాగానే.. ఈ యువరాజును పెళ్లాడబోయే అదృష్టవంతురాలు ఎవరా అని అటు అమ్మాయిలు, ఇటు సగటు సినీ అభిమాని ఎదురు చూస్తున్నారు. ఈ విషయం గురించి చిన్న వార్త బయటకు వచ్చినా.. స్పందన మాత్రం విపరీతంగా ఉంటుంది. దీని గురించి ఇప్పటికే కృష్ణంరాజు మీడియాతో మాట్లాడినట్లు వార్తలు రావడం, ఆయన వాటిని ఖండించడం కూడా జరిగింది. అయితే, తాజా వస్తున్న వార్తలను బట్టి తన పెళ్లి గురించి, ఆ అమ్మాయి గురించి ప్రభాస్ స్వయంగా తన సన్నిహితుల వద్ద వెల్లడించినట్లు ఫిలింనగర్ జనాలు మాట్లాడుకుంటున్నారు. తనకు కాబోయే భార్య.. వైజాగ్‌లో స్థిరపడిన ఉన్నత కుటుంబానికి చెందిన అమ్మాయని, తను బాగా చదువుకుందని, తన వ్యక్తిత్వం తనకు బాగా నచ్చిందని ప్రభాస్ తన సన్నిహితులతో అన్నాడట. అంతేకాదు, ఆ అమ్మాయి తనకోసం మూడు సంవత్సరాలుగా ఎదురు చూస్తోందని, నిశ్చితార్థం తరువాత అన్ని వివరాలు చెప్తానని కూడా అన్నాడట. ఇప్పుడే ఆమె పేరు, ఫొటోలు బయటపెడితే, ఆమె కుటుంబానికి ఇబ్బందిగా ఉంటుందనే ఉద్దేశంతోనే రహస్యంగా ఉంచుతున్నానని అన్నాడట ప్రభాస్. ఈ వార్తలు కాస్త బయటకు రావడంతో ఫిలింనగర్‌లో ఇప్పుడు ఎక్కడ చూసిన ప్రభాస్ పెళ్లి గురించే మాట్లాడుకుంటున్నారు.